Día Escolar da Non Violencia e da Paz
Ao longo do mes de xaneiro realizamos diferentes actividades para preparar a conmemoración do Día Escolar da Non Violencia e da Paz. Elaboramos con ilusión a decoración dunha árbore e diversas composicións plásticas; traballamos con cancións, contos, poemas e textos dramáticos relacionados coa tolerancia, o respecto, a solidariedade, a convivencia pacífica, os Dereitos Humanos e o rexeitamento de calquera tipo de violencia e sumamos bos desexos e ideas para fomentar unha cultura de non violencia e de paz.
“Cantarola dos nenos”
Amiguiños todos
amiguiños xa,
os nenos de aquí
e os nenos de alá.
Os nenos do mundo
todos a cantar
a unha mesma voz
collidos da man.
Cantarola nosa
de amor e de paz,
leda cantarola,
ledo rebuldar.
Rolda de sorrisos
dende mar a mar,
corazóns abertos
ollos de amigar.
Amiguiños todos
amiguiños xa
os nenos de aquí
e os nenos de alá.
Xosé Neira Vilas