Parlamento Xove 2016. ¡NORABOA!
A fase final da VII edición do Parlamento Xove tivo lugar o venres 15 e o sábado 16 en Santiago. O equipo de debate do noso centro, formado por César, Clara, Irina e Pablo, de 4º da ESO, conseguiu chegar ás semifinais do torneo. Un magnífico resultado que fai xustiza ao traballo feito por eles e ao altísimo nivel que demostraron como oradores e tamén, moi importante, como equipo. O equipo ao que nos enfrontamos no debate de cuartos de final celebrado no Hotel Hesperia Peregrino, foi o IES Monte Castelo de Burela e na semifinal, celebrada no Parlamento de Galicia, o equipo oponente foi o da CPR Sagrada Familia de Vilagarcía, equipos os dous que amosaron tamén á hora de debater sobre o tema proposto, “O machismo adolescente segue presente na nosa cultura?”, un nivel moi alto de preparación e de destreza. O equipo vencedor na categoría da ESO foi o “Becerreá 1”, do IES Becerreá, de Lugo.
Pasaron os días, as semanas, o tempo de preparación, un tempo para investigar, escribir, reescribir, ensaiar, debater, de novo debater, buscar exordios, datos, citas, preguntar, escoitar… e despois de todo isto só nos resta dicir que estamos moi orgullosos dos nosos rapaces e rapazas e moi satisfeitos porque esta experiencia resultou ser para todos unha grande aprendizaxe.