Tempo de espantallos
Para celebrar o Día das Letras Galegas léronse textos do autor homenaxeado, Ricardo Carvalho Calero e, como facemos todos os anos, tamén doutros autores e autoras que escriben en galego. Neste curso as lecturas foron por videoconferencia e viñeron con sorpresas.
En 1º e 2º de Primaria o alumnado recibiu unha encarga a través dun post publicado no blog de curso: facer unha composición plástica representando un espantallo cos brazos estendidos, sombreiro, sen gravata e amigo dos paxaros. Podían inspirarse na canción O espantallo divertido (Pan de millo – Migallas Teatro). Os traballos estarían preparados para as videoconferencias das Letras Galegas, pero manteríanse escondidos ata que houbese algún sinal.
Chegou o momento das videoconferencias e comezaron as sorpresas. Daniela e Vanessa, dúas compañeiras de ESO, conectáronse para recitar un poema de Ana Mª Fernández titulado, “casualmente”, Espantallo. Cando remataron, a sorpresa recibírona elas, pois o alumnado sacou os seus fermosos espantallos que ben valerían para ilustralo. Que momento tan emocionante!
Grazas a todos e todas polos vosos debuxos, pinturas e colaxes deses espantallos tan divertidos!
Moitas grazas a Daniela e Vanessa, que tamén repartiron sorpresas polos outros cursos de Primaria e Infantil con poemas de Ana Mª Fernández e Xosé Neira Vilas.
“Mais aí como o ves,
tan erguido e calado,
ten moreas de amigos
entre os corvos alados
e recita poemas
nos eidos sementados”
(Fragmento de Espantallo, de Ana Mª Fernández)
O espantallo divertido (Pan de millo – Migallas Teatro): http://www.kalandraka.tv/es/video/espantallo