XI Festa das Palabras
A XI Festa das Palabras, que desde o 2014 vén organizando en colaboración co Concello da Estrada o colectivo Dinamizastrada (no que se integran os Equipos de Dinamización da Lingua galega dos dez centros de ensino do noso concello) celebrouse o pasado 22 de maio no Teatro Principal.
Convocados un ano máis pola habelencia dos/-as nosos/-as xoves escritores/-as, que nesta ocasión crearon un microrrelato e un micropoema coas palabras “música” e “silencio”, quixemos render, como todos as primaveras, unha dupla homenaxe: ao noso idioma, para que siga a florecer, e a Luísa Villalta, autora á que se lle dedicou o Día das Letras Galegas.
O acto, presentado de maneira magnífica por Mateo e Lía, do IES García Barros, contou cun fermoso e acaído discurso de Carlos Loureiro, padriño desta edición; coa música de Luzía Azurmendi e membros do Obradoiro de música “Carlos Barruso” e, como non, coa entrega aos protagonistas dunha caravel e de cadanseu exemplar do libro deste ano. Sesenta e dous textos gárdanse desde xa nunha fermosa publicación, cunha portada alusiva ás palabras deste curso a cargo de Rosa de Cabanas, tan creativa coma sempre, e con dezaseis ilustracións feitas polo alumnado de Educación Infantil dos centros estradenses que teñen esta etapa ¡que mérito debuxar o silencio, a música!
En hora boa ao noso alumnado, que tan ben nos representou: Simón, de 2º EP; María, de 3º EP; Carlota, de 6º EP; Carolina, de 2º ESO e Iara, de 3º ESO, na modalidade de micropoemas. E Bruno, de 2º EP; Ana, de 4º EP; María, de 5º EP; Zoe, de 1º ESO e Blanca, de 4º ESO, na modalidade de microrrelatos. E por suposto, a Dinamizastrada por organizares tan fermoso acto.
Este ano tocou Luísa Villalta, poeta. Co silencio e a música das súas palabras naceron novos textos e agora só nos falta agardar o próximo curso para que, baixo o reclamo dun novo autor ou autora, novas creacións vexan a luz.
