Desfrutando na neve
A nosa viaxe comezou o martes 26 de madrugada, cando un grupo formado por alumnos de sexto de primaria e de todos os cursos de secundaria saímos, ás seis da mañán, dirección Leitariegos. A pesar de estar cansos, polo madrugón, estivemos desfrutando da paisaxe que viamos a través das ventás do autobús.
A primeira parada foi en Valcarce onde almorzamos e aproveitamos para estirar as pernas. A segunda xa foi en Villablino, pobo que hai anos vivía da minaría, onde recollimos o material que precisabamos para esquiar. Cando estivemos listos puxémonos camiño á estación de esquí. Ó chegar dirixímonos ás pistas subindo no telecadeira, que nos deixou na zona onde nos esperaban os monitores que nos ían ensinar o preciso para poder pasar dous días estupendos. Con moito frío e neboa desfrutamos dun bo día de esquí, facendo so unha paradiña ás dúas para comer e así ter o resto da tarde libre, no que cada quen aproveitou para seguir practicando as leccións que nos deran pola mañán. A última hora, deixamos todo no aluguer e marchamos cara o hotel, situado en Ponferrada, onde descansamos un pouco, cenamos e despois fomos a un bar a ver o “clásico Barça – Madrid”. Ó volver demos un paseo pola cidade e despois voltamos para descansar xa que ó día seguinte esperábanos unha xornada de esquí moi boa.
O mércores, baixamos almorzar ás 8 e despois de coller as maletas fomos á estación de esquí, pasando antes polo aluguer. Con mellores condicións meteorolóxicas, pasamos un día de esquí similar ó anterior onde desfrutamos da neve e do sol. Ó rematar, subimos ao autobús para voltar a Galicia, facendo unha parada en Lugo para descansar un pouco e cear. Sobre as dez e media da noite chegamos á Praza de Galicia onde os nosos familiares estaban esperando por nós, poñendo fin a unha excursión divertida onde non só esquiamos, senón que xogamos coa neve, botamos uns risos, coñecemonos un pouco mellor e desfrutamos todos xuntos.
Para ver a galería de fotos desta entrada ten que acceder ao Antigo Blog E. Secundaria
http://b-s.colexionslourdes.es/busqueda/
[ link=”file” ids=”4566,4567,4568,4569,4570,4571,4572,4573,4574,4575,4576,4577,4578,4579,4580,4582,4583,4584,4585,4586,4587,4588,4589,4590″]