Día da Terra
Este curso a celebración do Día Internacional da Nai Terra (22 de abril), máis coñecido como Día da Terra, tivo unhas connotacións especiais.
Por unha banda, en todo o mundo se sucederon mensaxes sobre a necesidade do coidado e protección da Terra que incluíron unha ollada á situación pola COVID-19, causante de que as conmemoracións se realizasen principalmente por medios telemáticos.
Por outra banda, este ano cumpríronse 50 anos do primeiro Día da Terra, que tivo lugar o 22 de abril de 1970 co obxectivo de concienciar sobre a necesidade de protexer o planeta.
Por se fora pouco, no noso Centro sumamos outra circunstancia especial, porque o noso lema durante todo o curso escolar 2019-2020 é POR UN PLANETA SAN. PENSA GLOBALMENTE, ACTÚA LOCALMENTE.
Desde comezo de curso viñemos realizando diversas actividades en todos os cursos de Infantil, Primaria e Secundaria: murais, lecturas, composición de textos, proxectos de investigación, teatro, cancións… O 22 de abril non ía ser menos e os nosos blogs de curso e plataformas (E-Dixgal e Moodle) enchéronse de propostas de actividades: lecturas, debuxos, vídeos, cancións, chuvias de ideas sobre como podemos contribuír ao coidado do planeta, propostas para reutilizar obxectos e materiais, invitacións a plantar sementes e observar o crecemento das plantas…
Agardamos que o noso lema cobre forza e pronto teñamos un planeta máis san en todos os sentidos!
Imaxes de WikiImages e Gerd Altmann en Pixabay (rexistradas no dominio público segundo licencias Creative Commons)