Día de Rosalía
Por primeira vez celebramos o Día de Rosalía o 23 de febreiro, grazas á descuberta, por parte da investigadora galega Sagrario Abelleira, da escritura notarial que confirma que Rosalía de Castro naceu o día 23 de febreiro de 1837. Ata agora tomábase como referencia a data da súa partida bautismal (24 de febreiro).
Ademais de comentar e ver unha imaxe do documento que levou a cambiar no calendario a celebración do Día de Rosalía, achegámonos de novo á vida e obra da escritora galega de máis sona a través de recitais, cancións, vídeos, actividades interactivas, visitas á páxina web do museo Casa de Rosalía e traballos manuais.
Miña casiña, meu lar
cantas onciñas de ouro me vals.
Vin de Santiago a Padrón
cun chover que era arroiar,
descalciña de pé e perna,
sin comer nin almorzar.
Polo camiño atopaba
ricas cousas que mercar
i anque ganas tiña delas
non tiña para as pagar.
(Fragmento de “Miña casiña, meu lar” de Follas novas).
Á esquerda, composición feita polo alumnado de 2º EP. Á dereita, imaxe modificada dixitalmente a partir do retrato póstumo de Rosalía de Castro que fixo en 1902 Antonio Portela Paradela (obra con consideración de material de dominio público ).