Excursión de 5º e 6º EP
O alumnado de 5º e 6º de Educación Primaria visitamos as cidades de Santiago de Compostela e A Coruña. Pola mañá estivemos coñecendo o Patrimonio da Universidade de Santiago de Compostela e aprendemos parte da súa Historia. Visitamos o colexio de Fonseca, onde alucinamos cun facsímil do libro máis antigo que alí se conserva (case 1000 anos!): O Libro de Horas do Rei Fernando I de León. Despois estivemos no salón noble e no Paraninfo da Facultade de Xeografía e Historia.
Pola tarde descubrimos recunchos da cidade da Coruña: comezamos a visita na histórica Torre de Hércules, recorremos o paseo marítimo da praia de Riazor, continuamos polo casco histórico ata a Praza de María Pita e rematamos o día no Museo Arqueolóxico e Histórico da Coruña, situado no Castelo de San Antón. Alí puidemos observar moitísimas pezas, armas, ferramentas, adornos e ata unha embarcación dos habitantes de Galicia na Prehistoria e Idade Antiga.
Pasámolo de marabilla!