“infinda”, “loita”… IX Festa das Palabras

O Teatro Principal acolleu por novena vez a celebración do acto da Festa das Palabras. Este ano volveu o formato coñecido, con xente con ambiente e co mesmo desexo de sempre, celebrar que falamos e escribimos nunha lingua e que desde ela, como desde calquera outra, podemos imaxinar mundos e ata chegar a crer neles.

Máis de 60 premiados e premiadas saíron da Festa das Palabras, celebrada o pasado 25 de maio, cun exemplar do libro editado cos traballos gañadores (que inclúe texto e fotos do alumnado gañador e debuxos realizados por nenos e nenas de EI). O acto, presentado por dous alumnos de bacharelato do IES Losada Diéguez, contou ademais coa música do grupo de Cuntis Favorita e as intervencións da representante do Concello da Estrada, Amalia Goldar, concelleira de Educación e, por suposto, da madriña da Festa, Rosalía Morlán, que dirixiu aos presentes unhas palabras de louvanza e recoñecemento do seu traballo.