Letras Galegas 2019. VI Festa das Palabras
Neste ano o Día das Letras Galegas dedicóuselle a Antonio Fraguas, home polifacético que escribiu sobre os nosos costumes e tradicións e foi recompilador dun bo número de cantigas da terra de Cotobade; puidemos coñecer tamén aspectos da súa vida e a súa estreita vinculación co noso concello (foi profesor no Instituto da vila antes da Guerra Civil). Alén dunha exposición con carteis alusivos ao Día e ao protagonista celebramos un acto na véspera do propio día das Letras.
E como cada ano, outras letras galegas, as saídas da creatividade do noso alumnado tiveron o seu momento de recoñecemento na “VI Festa das Palabras”, que tivo lugar no Teatro Principal o pasado día 4 de xuño; neste acto os alumnos e as alumnas premiados e premiadas recolleron o libro recompilatorio co seu texto xunto cun caravel.