VEXO VEO XACOBEO (II): Percorrido dun tramo do Camiño de Santiago (Plan Proxecta+)
O 9 de maio, debidamente ataviados cos chalecos reflectantes e gorras, recibimos no colexio a visita do narrador e actor Anxo Moure, que disfrazado de árbore e acompañado por un burro moi especial, nos fixo desfrutar coas cancións, rimas e reflexións sobre os valores vinculados ao Camiño de Santiago.
Recibímolo tocando as cunchas de vieira, un dos símbolos xacobeos por excelencia, e obsequiámolo co baile dunha muiñeira, acompañada coa percusión das cunchas, e coa canción rockeira “Dende A Estrada a Compostela”, cuxa letra compuxemos no colexio para este proxecto.
Con el percorremos un pequeno tramo do Camiño de Santiago, en concreto a ruta do Camiño da Geira ou dos Arrieiros que discorre entre a Praza do Concello e o Camiño do Cruceiro, pasando pola rúa do Cruceiro, na que se atopa o noso colexio. Anxo amenizou a andaina coas súas sabias palabras sobre a amizade, o respecto á natureza, a convivencia pacífica, a esperanza…
Fixemos unha parada no bar “As Tres Portiñas”, polo que cruzaba o Camiño Real, detivémonos no cruceiro que dá nome á rúa do noso colexio para admirar as figuras de Santiago Peregrino e San Roque, ambas elevadas sobre cunchas, e, por último, dende o Camiño do Cruceiro divisamos no horizonte a cidade de Santiago e o Pico Sacro, fonte dalgunhas das lendas ligadas á tradición xacobea.
Como nos gustou tanto esta experiencia, convidámosvos a todas e todos a percorrer algúns dos tramos do Camiño de Santiago que discorren polo Concello da Estrada:
- A Vía da Prata ou Camiño Mozárabe e o Camiño de Inverno comparten trazado ao seu paso polo noso concello, e discorren polas parroquias de Orazo, Loimil, Oca, Castro e Arnois.
- Ademais, tamén pasan pola Estrada outras rutas “menores”, como son o Camiño Miñoto-Ribeiro, o Camiño de Taverneiro e o Camiño da Geira ou dos Arrieiros.
Plan Proxecta +, Programa Vexo veo Xacobeo
Proxecto: Xa se ve Compostela! A Estrada e os Camiños de Santiago
