VEXO VEO XACOBEO (I): ETAPAS DO NOSO CAMIÑO (Plan Proxecta+)
Plan Proxecta +, Programa Vexo veo Xacobeo
Proxecto: Xa se ve Compostela! A Estrada e os Camiños de Santiago
Polas terras da Estrada pasan algúns dos Camiños de Santiago, como amosan as pegadas deixadas na arte, no saber popular, os símbolos do Camiño…e o propio tránsito de peregrinas e peregrinos.
Desde algunhas das ventás o noso Colexio pódese contemplar unha zona do val do Ulla, pola que discorren algunhas desas rutas, o Pico Sacro, moi ligado á tradición xacobea, e nos días claros incluso se poden albiscar a cidade de Santiago de Compostela e as torres da Catedral, é dicir, o lugar de confluencia dos diferentes Camiños de Santiago.
Contando con esta privilexiada situación, comezamos este proxecto con moita ilusión e con ganas de descubrir, aprender e compartir.
BO CAMIÑO!
O Pico Sacro coroando o horizonte recórdanos a lenda xacobea, a raíña Lupa e a Teodoro e Atanasio.
Os símbolos do Camiño de Santiago están por todas partes: aquí podemos ver unha Torta de Santiago decorada coa Cruz de Santiago e unha cuncha nunha das tapas de sumidoiro do Colexio.
Na Rúa do Cruceiro, onde se atopa o Centro de Educación Infantil e Primaria do noso Colexio, atópase este cruceiro. No fuste podemos ver as imaxes de Santiago (arriba) e San Roque (abaixo) representados como peregrinos, co sombreiro con cunha de vieira e capa. Ademais, Santiago leva un libro e un bordón e San Roque porta un báculo e levanta a roupa, nun xesto típico da súa iconografía para amosar as feridas.
Na Praza do Concello da Estrada hai dúas esculturas de peregrinos. O peregrino de ferro é obra de Manuel Lago Román e a outra é do escultor Cándido Pazos. En ningunha das dúas faltan os símbolos característicos que permiten identificalas, como a cuncha de vieira.
ETAPA INICIAL
Esforzo, compañeirismo, solidariedade, amizade… son valores moi ligados ao Camiño de Santiago, como tamén o son palabras e expresións como arte, patrimonio material e inmaterial, natureza, deporte, espiritualidade… Todas estas palabras aparecerán ao longo das diferentes etapas nas que, como símil do propio Camiño, se organiza este proxecto.
Pensamos, conversamos e escribimos sobre o que xa sabemos sobre o Camiño de Santiago e sobre que nos gustaría aprender. Tamén compartimos coñecementos: Leo tróuxonos unha Compostela e explicounos en que consiste e como se obtén. E coñecemos a Tina Calixtina! (a mascota deste proxecto). Creamos a nosa propia Tina e vestímola de peregrina!
Reunimos e lemos contos e información sobre o Camiño de Santiago. Coñecemos a Valentiño, Marosa, Mariña, Xina, Hiro… Tamén descubrimos un Xogo da Oca do Camiño de Santiago, que nos daría ideas para crear en 6º de Infantil o noso propio xogo adaptado á Vía da Prata.
Observamos e comentamos mapas cos Camiños de Santiago por Europa, a Península Ibérica, Galicia e A Estrada. Uns en papel, outros consultámolos con Google Maps e Google Earth.
ETAPAS DE DESENVOLVEMENTO
Traballamos os símbolos do Camiño de Santiago e da cidade de Santiago de Compostela: as frechas amarelas, as cunchas de vieira, a Cruz de Santiago, o skyline de Santiago…
Conversamos, lemos, escribimos, debuxamos, estudamos a Vía da Prata, coas súas etapas e principais cidades e monumentos, practicamos como conversar en inglés cos peregrinos e peregrinas que veñen de fóra… E cubrimos as nosas propias credenciais!
En febreiro, na Festa da Patroa, fixemos bailes con cancións relacionadas co Camiño de Santiago e dúas obras de teatro. O alumnado de 6º de Educación Infantil representou “Unha pequena gran axuda”, cunha simpática tartaruga protagonista que acabou recibindo moita axuda para percorrer o Camiño de Santiago, e bailou “A Santiago voy”. O alumnado de 2º de Primaria escribiu unha versión propia e teatralizada do libro “Bo Camiño, Valentiño!” e representouna, reservando para a parte final o baile da canción “Camiño das estrelas”.
Nas clases de Baile galego aprendemos unha muiñeira moi especial, pois acompañamos o baile coa percusión de cunchas de vieira.
O alumnado de 1º e 2º recibiu con sorpresa unha carta de Tina Calixtina! Ocorréuselle facer nada máis e nada menos que o Camiño Francés, e aínda viña polo Cebreiro!
Tivemos varias sesións de orientación espacial en Educación Física, para aprender a orientarnos en calquera camiño coa axuda dun compás.
Nunha destas etapas tamén coñecemos o videoxogo do VEXO VEO XACOBEO! Encantounos!
Pero non rematamos aínda o Camiño. A meta está próxima, mais quedan aínda as últimas etapas para concluír os produtos finais dos que daremos conta noutro post. E tamén algunha sorpresa!
BO CAMIÑO!