“VII Festa das Palabras”, este ano tamén
A COVID-19 fixo que a VII Festa das Palabras tivese que agardar. E agardou. Non foi en xuño, a súa data habitual, senón case entrando no inverno cando as palabras escollidas para a ocasión, cabelo e amigo, reapareceron relocentes, coma se levasen traxe novo, desde as páxinas do libro presentado do VII Concurso de Microrrelatos e Micropoemas. A publicación, ademais de recoller os micropoemas e microrrelatos premiados, inclúe tamén catorce ilustracións de nenos de Infantil, un prólogo do escritor Xosé A. Neira Cruz e a tradicional portada alusiva da deseñadora estradense Rosa de Cabanas.
O acto non puido ser doutra forma pero o importante é que foi, que tivo o seu momento e o seu lugar: o pasado martes, 15 de decembro, no Teatro Principal. Faltou a música, faltou a presenza física do padriño, Xosé Neira Cruz, do alumnado foi só unha representación, un gañador ou gañadora por centro, igual ca os profes, e sentiuse a ausencia coma poucas veces iso acontece nun teatro, mais a alma da Festa das Palabras, da lingua, asomou por entre as follas dos libros para aplaudirnos e darnos azos a todos os presentes, a toda a comunidade educativa. ¡Tanto poden as palabras!