Volveu a Festa da Poesía

A pandemia silenciou, como leva acontecido con tantas outras celebracións,  a Festa da Poesía pero neste curso a lembranza da poeta Avelina Valladares e  os versos puideron retornar ao noso Teatro Principal. O pasado venres, 3 de decembro, recordamos a escritora de Berres coa entrega do XXV Premio de Poesía “Avelina Valladares” ao galardoado deste ano, o poeta noiés  Manuel López Rodríguez, que gañou co seu poemario Para que non me esqueza. E tratándose de festa poética non podía faltar o tradicional recital que seguiu  ao momento da entrega. Entre os versos dos centros escolares e de representantes do sector sanitario estiveron os das nosas alumnas: Sara, Blanca e Carmen, de 2º ESO, que lle puxeron voz ao poema de Aquilino Iglesias Alvariño, “Nunha cea de amigos”, unha magnífica representación nun acto que se abriu e pechou coas cancións da Banda da Loba.

Outra vez, por fin, músicas, poetas, recitadoras, xuntas no Teatro Principal da Estrada.