A ESTRADA: QUE BONITA É!
Un dos proxectos interdisciplinarios que desenvolvemos en E. Primaria ao longo deste curso 2024/25 titulouse “Redescubrir A Estrada. Paisaxe, urbanismo e patrimonio”, e foi deseñado polo profesorado do centro no marco do programa educativo ProxectoTERRA, pertencente ao Plan Proxecta+.
Aproximámonos á Estrada urbana e rural partindo do máis próximo: o patio do centro de Educación Infantil e Primaria, situado na vila da Estrada, e as instalacións deportivas do colexio, que están en Matalobos. Durante o curso fixemos varias veces o camiño entrambos por diferentes rutas (nas festas do Magosto, Maios e Letras Galegas e Festa do último día de clase), para traballar diversos aspectos do entorno, ademais de desfrutar da natureza. Tamén redescubrimos a vila coa actividade “A vila da Estrada” (5º e 6º EP) e coñecemos dúas parroquias rurais na excursión a Sabucedo e Codeseda (1º e 2º EP).
Estas saídas foron seguidas dunha posta en común de experiencias:
Ademais destas actividades, durante o 3º trimestre tamén fixemos outras que permitiron completar as múltiples olladas á Estrada:
O alumnado de 6º EP pintou o lugar máis próximo no que xoga todo o alumnado: o patio do colexio.
Nas clases de Educación Física o alumnado de 1º e 2º fixo actividades de orientación.
Nas clases de Inglés e Social Science traballouse cos mapas da Estrada proporcionados polo Departamento de Cultura do Concello da Estrada.
Por último, aínda que queda moita Estrada por descubrir ou redescubrir, chegou o momento de elaborar os produtos finais.
Debuxamos un mapa da Estrada coas súas 51 parroquias… 51!
E cos seus nomes decoramos a entrada do colexio.
Fixemos unhas postais recomendando os nosos lugares favoritos para visitar na Estrada. Con elas creamos un gran mural: cantas propostas de lecer!
Deseguida, xuntamos algunhas das creacións no patio e buscamos, lemos, comentamos…
Despois de darlle todas estas voltas á Estrada, chegamos a unha conclusión:
A ESTRADA: QUE BONITA É!
