Enrique Otero presentounos a Dorothé Schubarth

O 16 de maio tivemos unha sorpresa moi especial, enmarcada dentro das celebracións con motivo do Día das Letras Galegas. Enrique Otero Fernández, fundador e primeiro director do noso colexio, fixo para nós dúas charlas cheas de historia e emoción a fin de presentarnos a traxectoria e valiosas achegas á cultura galega dunha amiga súa: Dorothé Schubarth.

Dorothé Schubarth (1944-2023) foi unha musicóloga, compositora e profesora suíza que a finais dos anos 70 e comezos dos 80 percorreu Galicia para realizar recolleitas da nosa música tradicional, seguindo un rigoroso método de investigación. Posteriormente publicou xunto a Antón Santamarina o Cancionero Popular Galego, unha obra fundamental para o estudo, conservación e difusión do folclore musical de Galicia. Nel, ademais das partituras e letras de tantos cantos populares, aparecen tamén referencias a algunhas das cantareiras homenaxeadas este ano no Día das Letras Galegas.

Saber que Dorothé estivo con Enrique Otero e a súa familia no noso colexio e ver cartas, fotografías e outros obxectos, ademais dos volumes do Cancioneiro, provocounos unha grande emoción.

MOITAS GRAZAS, ENRIQUE, POR COMPARTIR CON NÓS ESTAS VIVENCIAS!