LETRAS GALEGAS 2026, Begoña Caamaño
Coma todos os anos celebramos a Semana das Letras, un tempo de recoñecemento e homenaxe á nosa lingua e á nosa literatura. Nesta ocasión, a figura protagonista foi a da escritora galega Begoña Caamaño, referente das letras galegas máis actuais e autora dunha obra comprometida coa cultura e cos valores da modernidade en moitas das súas vertentes (xénero, ecoloxismo, identidade, etc.).
Na ESO, durante toda a semana, realizamos distintas actividades arredor da súa figura; nas clases de lingua puxéronse vídeos para coñecer mellor a súa vida e a importancia (e vixencia) dos seus escritos mentres que a decoración do centro contribuíu tamén a crear un ambiente de achegamento á autora e á súa obra.
O xoves, 14 de maio, tivo lugar o acto conmemorativo das Letras Galegas. Nel fixemos lectura de fragmentos das súas novelas e entregáronse os premios dos concursos organizados para acompañar esta celebración (o V Concurso de Xeróglifos e o Kahoot sobre Begoña Caamaño). Ademais, proxectouse un vídeo sobre a participación do equipo de debate no concurso do Parlamento Xove deste ano. O acto rematou coa intepretación do Himno Galego.
O venres, 15 de maio, tivemos tamén a sorte de contar coa visita de Juan Andrés Castro Fernández, escritor e vello amigo do centro, que nos ofreceu unha interesantísima charla sobre a historia da escrita desde os seus comezos ata a actualidade. Ao longo do encontro, Juan Andrés fixo unha viaxe apaixonante polos primeiros sistemas de comunicación da humanidade, explicando como naceron os distintos alfabetos e como evolucionaron os soportes da escritura ao longo dos séculos. Cunha exposición amena, chea de curiosidades e exemplos, conseguiu atraer a atención do alumnado, que participou activamente durante toda a charla.
A súa visita foi, unha vez máis, unha magnífica oportunidade para reflexionar sobre o valor da palabra escrita, da lectura e da transmisión da cultura, valores que non hai que deixar de reinvindicar (e de poñer en práctica) e que conectan moi directamente coa celebración das nosas Letras e co seu espírito divulgador.
