Peche do curso con deporte, ledicia e corazón solidario
O colexio dixo adeus ao curso 2025/2026 coa mellor das despedidas: unha xornada chea de movemento, risas e compromiso que reuniu a toda a comunidade educativa nunha celebración moi especial.
A primeira parte do día levounos ao aire libre. O alumnado percorreu os case dous quilómetros que separan o edificio de Infantil e Primaria, na rúa O Cruceiro da Estrada, das instalacións deportivas e do centro de ESO en Santa Baia de Matalobos. Ao longo do camiño, atravesamos a zona deportiva da Estrada e a Barranqueira de Ponte Nova, descubrindo de paso as diferenzas entre o espazo urbano e o rural, e reflexionando sobre o coidado do entorno e a mellora das infraestruturas do noso territorio. Ademais, esta andaina puxo o broche final ao ProxectoTERRA (Plan Proxecta+), un proxecto desenvolvido ao longo de todo o curso en Educación Primaria.
Xa nas instalacións, chegou o punto álxido da xornada coa Carreira Solidaria en colaboración con Save the Children. O entusiasmo do alumnado de Infantil e Primaria e o xeneroso patrocinio das familias fixeron que a iniciativa superase todas as expectativas. Grazas ao compromiso de cada persoa que formou parte desta aventura, conseguimos algo máis que rematar o curso: contribuímos a facer o mundo un pouquiño mellor. MOITAS GRAZAS!
Balonmán, fútbol, datchball e brilé foron algúns dos deportes que seguiron enchendo a mañá de enerxía, xunto con actividades lúdicas como o paracaídas.
Así pechamos este capítulo, co corpo canso, o corazón cheo e un recordo fermoso que levaremos con nós ata o vindeiro setembro.
