XII Festa das Palabras: “era unha vez un pobo e unha pandeireta…”
O pasado 28 de maio, o Teatro Principal da Estrada encheuse un ano máis de palabras e creatividade desbordante coa celebración da XII Festa das Palabras, unha iniciativa de Dinamizastrada (colectivo de profesores e profesoras dos Equipos de Dinamización Lingüística dos centros de ensino da Estrada) que promove o uso da lingua galega a través da creación literaria do alumnado dos centros de ensino do concello.
Neste curso 2024-2025 os microrrelatos e micropoemas xiraron arredor de dous termos inspiradores, “pandeireta” e “pobo”, ese foi o motivo creativo para os textos do alumnado participante e de todos eses textos 62 autores/-as recibiron, coma vén sendo costume, o libro conmemorativo da presente edición e un caravel.
A escritora Susana Sánchez Aríns, madriña da XII edición, acompañounos coa súa presenza e coas súas palabras, ofrecendo unha intervención, a partir da lectura dun poema seu, chea de compromiso, lucidez e amor polo idioma. E como non, non faltou a música, o grupo musical estradense O Regueiriño de Lamas puxo a parte musical para unhas Letras galegas, as deste ano, nas que música e palabras camiñan máis xuntas ca nunca.
