Día das Letras Galegas 2021
A semana pasada estivemos traballando e facendo diversas actividades para celebrar o Día das Letras Galegas. Investigamos e aprendemos moitas cousas sobre a vida e obra da escritora homenaxeada deste ano, XELA ARIAS, vendo uns vídeos chulísimos e facendo actividades en liña a través das TIC.
Tamén houbo tempo para a lectura, coma por exemplo “Os homes de manteiga”, unha das historias de Contos ao teléfono, de Gianni Rodari, que Xela traduciu ao galego. Ou o seu conto “A fraga dos paxaros faladores e a fraga leopardicia”, que escribiu cando tiña tan só 11 anos! Demos renda solta á nosa vea artística deseñando uns marcapáxinas ou reinterpretando algún dos seus retratos ao noso xeito. Quedáronos moi orixinais!
Como fin de festa o alumnado de 6º de Primaria tiñanos preparada unha sorpresa. Tocaron e cantaron en directo! Puxéronse en contacto coa Banda da Loba e interpretaron unha das súas cancións, na que a letra é un poema de Xela Arias: Intempériome. As guitarras, o violín, a percusión e o coro estiveron espectaculares! Para rematar, profes e alumnado cantamos xuntos o Himno Galego.
