FESTA DA POESÍA 2023
Como xa vén sendo tradición chegando o inverno, e contra todo prognóstico, agroma a Festa da Poesía. Neste evento, que tivo lugar o pasado xoves, 14 de decembro, no Teatro Principal da Estrada, fíxoselle entrega do XXVII Premio de Poesía Avelina Valladares ao autor noiés Manuel López. Esta é unha celebración que organiza o Concello da Estrada a través do seu Departamento de Cultura e na que ademais de facerlle o xusto recoñecemento ao gañador do certame se exalta a poesía da mellor forma posible, escoitándoa e léndoa. Nesta edición, Sofía Penas Rey e Iara Blanco Varela, alumnas de 3º da ESO, recitaron de forma espléndida dous poemas, “A rosa”, de Miro Villar e “Quixera ser pirata”, de Marta Dacosta.