VEXO VEO XACOBEO (III): PRODUTOS FINAIS (Plan Proxecta+)
Plan Proxecta +, Programa Vexo veo Xacobeo
Proxecto: Xa se ve Compostela! A Estrada e os Camiños de Santiago
No mes de maio o noso proxecto sobre o Camiño de Santiago enriqueceuse con tres sorpresas:
1 Compuxemos unha canción, “Dende A Estrada a Compostela”, en galego e inglés, e cantámola a ritmo de rock.
2 Recibimos a visita de Anxo Moure, que nos acompañou no percorrido dun tramo do Camiño de Santiago. O post desta xornada pódese consultar neste enderezo: /percorrido-dun-tramo-do-camino-de-santiago-plan-proxecta/
3 Na excursión de 1º e 2º de Primaria a Sabucedo e Codeseda, ademais de coñecer patrimonio artístico e cultural do Concello da Estrada, percorremos un tramo do Camiño da Geira ou dos Arrieiros. Tivemos que seguir as frechas amarelas!
O MURAL (1º e 2º EP)
No mural recréase a ruta dos principais Camiños de Santiago que pasan pola Estrada, sendo o máis coñecido o Camiño Mozárabe ou Vía da Prata, que comparte trazado co Camiño de Inverno ao seu paso polo nordés do noso concello, cruzando as parroquias de Orazo, Loimil, Oca, Castro e Arnois. Tamén se marcou o trazado aproximado do Camiño Miñoto Ribeiro e do Camiño da Geira ou dos Arrieiros.
Ademais, destacan no mural os valores do Camiño (esforzo, compañeirismo, solidariedade, amizade…) e completan a colaxe uns peregrinos e peregrinas moi particulares: Valentiño, Marosa, Mariña, Xina, Hiro, Max, Ben e Hugo, personaxes dos contos sobre o Camiño que traballamos, e a querida tartaruga Tina Calixtina.
OS CADERNOS DE BITÁCORA (E. INFANTIL e 1º e 2º EP)
Ao longo do proxecto, cada nena e neno foi elaborando diferentes traballos escritos e ilustrados que agrupamos a fin de curso formando libriños ou sobres, a modo de cadernos de bitácora. Amosamos algúns exemplos de cada curso:
4º E. Infantil
5º E. Infantil
6º E. Infantil
1º e 2º E. Primaria
DECORACIÓN DA ENTRADA DO COLEXIO (E. INFANTIL e 1º e 2º EP)
Tamén decoramos a zona exterior do Colexio cubrindo esta estrutura coas nosas imaxes de peregrinos e peregrinas coas vestimentas tradicionais, os símbolos da frecha e a cuncha e un debuxo da Catedral de Santiago coloreado polo alumnado de 2º EP.
Así rematamos o noso camiño. E con moito agarimo desexámoslle a todas as peregrinas e peregrinos:
BO CAMIÑO!