As fresas de Berres e O Pazo de Oca

Chegou o día de preparar a mochila e a viseira para ir de excursión. Con moita ilusión subimos ao autobús que nos levou, en primeiro lugar, ata o val do río Ulla en Berres, onde nos esperaba a familia de Laura para ensinarnos os invernadoiros de amorodos que cultivan na súa Horta Río Ulla Sat.

Raquel explicounos un pouquiño de como fan para plantar, coidar e tamén como se recollen. Puidemos practicar e de paso ir degustando esta rica froita.

Agasalláronnos cun botiño de marmelada feita pola avoa de Laura.

A seguinte parada foi o Pazo de Oca, o noso Versalles Galego. Un lugar fermoso que merece a pena visitar . Para nós foi como un parque temático de aventuras ao aire libre, coas súas aves acuáticas nadando ao redor dos barcos de pedra, o laberinto de setos, os túneles secretos, os cañóns, as pontes de pedra, as fontes, o paseo dos Tilos, a serpe de pedra, as camelias… e un montón de rincóns a descubrir.